Exodus 16
1Avong vahis muli, me-Isrel vasi keil uva ran out avise en Alim. Ka en avong koa vi teindan elim (15) ten avati koa elu, mulin avati tai katau en avong amea ran out Isip, keil umai en out volvol koa avise en 'Saen.' Saen mul luhu Alim keilu Vatihou Senae. 2Ekonek, keil vasi arun kutut kat Mosis keilu Eron 3avit, “Tahos imok keke Iahova vou vinvini komai tuai en out Isip. Ekonek mekilea mevatondan ka mevan vuseri ka tounah sav teimun keil vahi houlu. ?Vensa kamil millah komai memai en out volvol ekek amai val vat komai ka mevamatmat?”4Iahova viteni min Mosis vit, “Kosa numon anien hetivtiv hesuval ous koa mus heka en teilang hemita ven kami vasi. Meatin keil iha en avong vasi, ilahi hevinvin enges ten avong enek. En sise koanik inau nisak vis keil keke nihotini usil kat selusien keil onak vuo irmusiltei. 5En avong ahetai (6) ten wik vasi keil, akilea avalahi ka avasak meseni vavinvin ten avong elu.”
11Iahova viteni min Mosis vit, 12“Naraengon selkututien onen me-Isrel keil. Kihiteni min keil keke en mendilah enek, keil ian vuseri, ka en visokon, keil akan vini keil en veret. Hesakini keil ilea keke inau, Iahova, navi Ahi one.”
13En mendilah enek, aman keil koa avise keil en 'kuel' umai asien out koa amul ien, ka amuas keil ka akan vini keil eni. Ka en visokon, out vasi memer en tilep. 14Navong meteiai kan out memes, ales tilep mai vi tounah tai koa mahinhin ka mukut, mul en atan ka tounah vasi. Ka navong arokoli, merangli. 15Navong me-Isrel keil alesi, alei rasi ka amul avis ris keil en selusien one avit, “?Manna?” koa aneite teni vi “?Asa keinek?”
Mosis viteni min keil vit, “Koanik anien koa Iahova sani min kami mivani. 16Iahova meng kat kami keke kami vasi mihesien mari kap helu ven meatin tetai. Mihelahi hevinvin en asa koa teim onami akilea avani en avong vatas.”
17Me-Isrel keil amumoni suval kei viteni: koan en keil alahi houlu, ka keil en koa alahi havivi enges. 18Navong avuli kap teni, koakeil alahi houlu alesi vinvin en teim one, ka koakeil alahi havivi enges, keil emun alesi vinvin en teim one. Keil vasi alahi vinvin en keil. 19Mosis viteni min keil vit, “Tovuol en kami helingi hetokol visuvong.” 20Ka keil koa arlong kattei Mosis ka avit avaling tei vales vatokol visokon. Ka en visokon enek, manna enek, oul keil akikistal ien ka vite vo. Navong Mosis lesi, vuroh kat keil. 21En visokon vasi, meatin vasi keil uva alahi vinvin enges ven teim se. Ka navong meteiai sakin out mai mutin, asa koa mules en atan mukurle.
22En avong ahetai (6) ten wik, keil alahlah manna vinvin ten avong elu, kap ehat onen meatin tetai. Hetetamen keil ten vatiamal keil umai ales Mosis ka avit usili mini. 23Kei viteni min keil vit, “Ahi meng kati keke visuvong hehi avong votut tasehien, vi Sabat onen. Sakini kosa, asa koa mivit mivani, kei mihetani vuo mihekukoni en oai usil rendemien onami. Ka hatte koa hehi teisao, miheling revi heles hehi ten visuvong.” 24Suval koa Mosis meng kat keil eni, keil aling revi koa teisao rokol avong out mulan ka kei rotisatei, oul keil arkistaltei ien. 25Mosis vit, “Kosa, mihean koanik ven kosa vi Sabat onen Ahi, avong votut tasehien. Mihervotin etai anien hae en out roro ien. 26Avong ahetai en wik miheha mihelah anien ami, ka en avong oulu (7) koa vi Sabat, mihervotintei.”
27Heisavos Mosis viteni mukonek, en avong oulu (7) ten wik, meatin keil koan uva avalahlah anien ka arvotintei. 28Sakini Iahova viteni min Mosis vit, “?Kami miheles mihesesein mengkatien keil onak hetokol avong sa? 29!Milesi! Inau, Iahova, nasan avong tai tasehien min kami. Ven koanik, en avong koa vi ahetai (6) ten wik vasi keil, nisan anien min kami hevinvin ten avong helu. Ka en avong oulu (7) ten wik, meatin vasi keil itos en out koa keil amul ien, meatin hetovuol houal ran teim onen.” 30Sakini, meatin keil armumtei en avong oulu (7). 31Me-Isrel keil avise anien enek en 'manna'. Kei suval titi uti ai koa muoh, ka akani kas suval kek koa hani mul ien.
Copyright information for
PMA